إزاي بنأمّنك
إنك تخرج مع ناس ما تعرفهمش محتاج ثقة. دي اللي إحنا عاملينه علشان تيجي وانت مرتاح — مش كلام، ده اللي شغّال في الموقع دلوقتي.
1
محدش بيدخل المجموعة من غير ما يدفع
الحجز ما بيتأكدش لوحده. إحنا بنشوف كل تحويل بعينينا وبنأكّده بإيدينا. يعني اللي قاعد معاك عدّى من قدامنا، مش دوس زرار وخلاص.
2
العنوان ما بيوصلش غير للي دفع
قبل ما تحجز بتشوف المنطقة بس. العنوان بالظبط بيوصل للي أكّد حجزه — مش معروض على الموقع ولا بيتبعت لحد تاني.
3
بتعرف مين جاي معاك قبل ما تروح
المجموعة بتتكشف قبل الخروجة. وقبل الكشف بتشوف الأرقام: كام واحد حاجز، وكام بنت وكام ولد، والسن. يعني عمرك ما بتروح وانت مش عارف رايح على إيه.
4
رقمك مش بيروح لحد
الأرقام كلها مخفية والكلام جوه الموقع. والشات بينك وبين حد لوحده ما بيتفتحش غير لو الاتنين اختاروا بعض بعد الخروجة — من طرف واحد ما بيحصلش.
5
الشات بيتقفل بعد الخروجة
شات المجموعة بيتقفل لوحده بعد ما الخروجة تخلص. مفيش جروب فاضل مفتوح على طول وانت مش عايزه.
6
فيه بلاغ في كل رسالة
أي رسالة تضايقك تقدر تبلّغ عنها من مكانها. البلاغ بيوصلنا، وبنقدر نشيل اللي عمل كده من المجموعة أو نقفل حسابه خالص.
7
فيه سن أدنى، والقاعدة هي اللي بتمنع
الحجز من سن معيّن، والرحلات اللي فيها مبيت من سن أكبر. ده مش شرط مكتوب في صفحة — ده شرط في قلب الموقع، اللي ما ينطبقش عليه الحجز بيترفض قدامه.
خروجات بنات بس
فيه خروجات للبنات بس. تقدري تفلتريها من الرئيسية من كبسولة «بنات بس»، وتقدري تفتحي واحدة بنفسك من «افتح خروجة».
وتقدر تخلّي حد مطمن عليك
من صفحة حجزك بتعمل رابط وتبعته لأمك أو لصاحبك. هو هيشوف رايح فين وامتى، وهيعرف أول ما توصل — ومش هيشوف أي حاجة تانية. والرابط بيقفل لوحده بعد الخروجة، وتقدر تقفله في أي وقت.
لو حصل أي حاجة
الرقم ده شغال طول وقت السبوطة.
كل اللي معاك رقمه متحقق ووافق على القواعد.